វរសេនីយ៍ទោ ហេង ពិសិដ្ឋ ត្រូវបានទទួលពិន័យ និងយកទៅបញ្ឈរជើងក្រោយហេតុការណ៍បើកបររថយន្តបែបទំនើង
ភ្នំពេញ៖ នៅទីបំផុតវរសេនីយ៍ទោ ហេង ពិសិដ្ឋ អនុប្រធាននាយកដ្ឋាននៃនាយកដ្ឋានអង្គរក្ស របស់អគ្គស្នងការដ្ឋាននគរបាលជាតិ ក្រសួងមហាផ្ទៃ ត្រូវបាននាយឧត្តមសេនីយ៍ ស ថេត អគ្គស្នងការនគរបាលជាតិ បញ្ជាឲ្យដាក់ពិន័យ និងយកទៅបញ្ឈរជើងនៅអង្គភាពក្រោយពេលបើករថយន្តបង្កឱ្យស្ទះចរាចរណ៍ពេញផ្លូវកណ្តាលរាជធានីភ្នំពេញ និងចុចស៊ីផ្លេមុខមន្ទីរពេទ្យ ប្រើពាក្យសម្តីគ្មានសុជីវធម៌ មើលងាយនគរបាលសណ្តាប់ធ្នាប់ក្នុងពេលកំពុងសម្រួលចរាចរណ៍ កាលចុងខែមិថុនាកន្លងទៅថ្មីៗនេះ។
វរសេនីយ៍ទោ ហេង ពិសិដ្ឋ បានទទួលរងការរិះគន់ជាច្រើនពីសំណាក់អ្នកលេងក្នុងបណ្តាញសង្គម ដោយថាវរសេនីយ៍ទោរូបនេះជាបុគ្គលគ្មានសីលធម៌ អាងអំណាចធ្វើឱ្យកកស្ទះចរាចរណ៍ពេញផ្លូវ តាមបណ្តោយមហាវិថីសហព័ន្ធរ៉ុស្ស៊ី ក្បែរមន្ទីរពេទ្យកុមារជាតិ។
